A taddart-iw, nekk zedɣeɣ anda-nniḍen, kemmini tzedɣeḍ ul-iw - Tabouanant

Akken yebɣu yili lḥal, taddart d taddart-ik a winnat. Xas tezgiḍ-d akkin i lebḥar, meɛna ‘’Tassa tamcumt’’, akken qqarent temɣarin-nneɣ, ur ak-tetthenni ara. ‘’Aẓar yettabaɛ tara’’ i as-nnan, diɣ, yimeɣnasen. Inzan-a, ad ten-naf s ttbut ɣer yiminigen iqbayliyen imi mazal-iten la seḥbibiren ɣef wassaɣen i ten-yezdin akked tudrin-nsen : tafekka-nsen dinna, ul d yiḥulfan da. Ihi, ula d iminigen n taddart n Tala Athmane ddan deg umecwar-a imi tiddukla-nsen ‘’TALA’’ iqeddcen deg Fransa tettɛawan, yal tikkelt, imezdaɣ n taddart-nsen deg yisenfaren i d-ssewjaden. Tikkelt-a, wwin-d arrazen imeqqranen i yinelmaden i d-yufraren deg ukayaḍ n uswir wis5 n uɣebaz amenzu ‘’Atmaten MOULA’’. Ɣef waya, dɣa, i fursen yimḍebbren n tiddukla n yimawlan tagnit i wakken ad d-heggin yiwen n temlilit anda i rran tajmilt i yinelmaden ifazen n uɣerbaz-a. Am yal tikkelt u tura tuɣal d tannumi, d tanelmadt Anais yettmeslayen 3 n tutlayin (Tamaziɣt, tarumit d taɛrabt) akken igerrez i iseddan leqdic n temlilit seg tazwara ar taggara. Am wakken, diɣ, tella temlilit-a d taswiɛt i yimḍebbren n taddart i wakken ad ṛeggmen(ad fken awal) tifrat i yal ugur i d-yettmagar uɣerbaz, ladɣa imi d imḍebber deg tɣiwant i t-id-yennan. Ma d aselway n tiddukla n yimawlan n yinelmaden, yessnemmer aṭas akk ixeddamen n uɣerbaz, ama d anemhal-is aqdim, ama d ajdid-a akked yiselmaden. Yesmekta-d, s yiseɣ, d akken snat n tnelmadin n uɣerbaz i d-yezgan gar tmezwura deg lwilaya n Tizi Uzzu s tezmilt : 9,90/10. Tigi d, BENKANOUN Tifinagh d HANNOUCHE Ines. Gar yiminigen i yellan deg temlilit, ad naf : Boumala Mourad d gma-s Rezzak, Moula Ramdane akked Ouanouche Yasser. Wigi, beggnen-d lferḥ-nsen imi i d-uɣalen ɣer umekkan anida ɣran yakan. Wehmen, daɣen, deg udem ajdid i yesɛa uɣerbaz-a akka tura. Yuɣal igerrez nezzeh ɣef wakken i d-nnan. Tekfa temlilit s tukci n warrazen i yinelmaden deg yiwet n tegnit n unecraḥ d lmakla n kra n tẓidanin. Ma d arrazen, zyada ɣef les télescopes i d-wwin yiminigen n taddart, tefka-d tenmehla n yidles n Tizi Uzzu idlisen i yinelmaden akken ma llan.

Hocine M.